سدھی راہ سرائیکی شاعری دے حوالے نال اپنی نوعیت دی پہلی منفرد کتاب ہے
اللہ سئیں سورۃ العصر اچ فرمائے جو جہڑے لوگ سدھے رستے تے ہن او کامیاب ہن۔ مئیں کتاب دے فنی تے فکری جائزے دی گال نی کریندا۔کیوں جو مئیں کوئی
وڈا شاعر کائنی۔ پر ایہ گالھ ضرور آکھساں جو کتاب خلوص دل نال لکھی گئی ہے۔ ایندے وچ اسلام دی محبت شامل ہے۔ دل آلی گالھ دل آلے جانڑدن۔ کیوں جو جہڑھی گال دل کنوں نکلے او اثر رکھیندی ہے۔ اپنی دھرتی نال، اپنے وسیب نال ہر انسان کو محبت کرنی چائدی ھے۔ تے دل نال محبت کرنی چاہدی ہے۔ سچی گال تاں اے ہے
جو دل بہوں وڈی شئے ہے۔
حضرت سلطان باہو سئیں فرمائے
دل دریا سمندروں ڈونگھے
کون دلاں دیاں جانڑے ہو
❤❤❤❤❤❤❤❤❤❤
❤ منت ❤
سارے گناہ میڈے اللہ توں معاف کر ڈے
ہُن بئے گناہ نہ تھیسن، دل ہُن گناہ توں ڈردے
توں ہیں وھاب اللہ، نظر کرم توں کر ڈے
مئیں بے شرم جہیاں ھاں، توں با شرم کر ڈے
❤ حمد ❤
خالق کائنات دا ہیں
مالک کائنات دا ہیں
ہر جا خدائی تیڈی
قادر توں ذات دا ہیں
ڈینہہ ہے پیا ویندا
ہے رات پئی آندی
اللہ توں ونڈیندا بیٹھیں
خلقت ہے پئی کھاندی
رحیم ہیں توں اللہ
رحمن توں سڈیندیں
مالک کائنات دا ہیں
قدوس توں پڑھیندیں
تیکوں سلام بھیجاں
مومن دی ہے نشانی
مھیمن ہیں توں اللہ
عزیز توں رکھیندیں
رازق کائنات دا ہیں
سب کوں توں رزق ڈیندیں
قادر ہیں بادشاہ ہیں
کیڑے کوں وی کھویندیں
غفار توں ہیں اللہ
مئیں تے کرم کماویں
ہاں خطا کار تیڈا بندہ
گناہواں توں ہُن بچاویں
قہار ہیں توں اللہ
میکوں نہ کلھا چھوڑیں
محشر دے ڈینہہ اللہ
وحید توں مونہہ نہ موڑیں
❤نعت رسول مقبول صل اللہ علیہ وآلہٖ وسلم❤
میڈے نبی دا رُتبہ
اللہ نے ایں ودھایا
معراج تے سڈوسی
دیدار ھئی کرایا
میڈے نبی دا رتبہ اللہ نے ایں ودھایا
نبی دی سواری
جبرائیل گھن کے آیا
کعبے توں بیت اللہ
سوہنے کوں ہئی پچایا
امامت کرائی سوہنے
پچھوں نبی کھڑے ہن
امام الانبیا دا
سوہنے نے شرف پایا
میڈے نبی دا رتبہ اللہ نے ایں ودھایا
میڈا نبی تاں او ہے
آسمان ڈیکھ آئے
اللہ جتھاں ہے راہندا
او جہان ڈیکھ آئے
اللہ تے میڈا سوہناں
روبرو وی تھئے ہن
گالھیں کریندے رہ گئے
گالھیں وہ لگدے سیھ ہن
واپس اللہ نے خالی
محبوب کوں نہ ٹورا
تحفہ نماز دا او
نال گھن کے آئے ہن
میڈے نبی دا رتبہ اللہ نے ایں ودھایا
معراج تے سڈو سی دیدار ھئی کرایا
جنت وی ڈیٹھی سوہنے
دوزخ وی ڈیکھ آیا
میڈے نبی دا رتبہ اللہ نے ایں ودھایا
رف رف دا تخت ھئی
جس تے سوار تھئے ہن
جینکوں ڈیکھ کوئی نی سگدا
اونکوں او ڈیکھ آئے ہن
سبحان اللہ۔۔۔۔۔۔۔
❤ اللہ دی ذات ❤
اللہ کائنات تیڈی، جیندا حساب کائنی
سوہنی بہوں بنائی، تیڈا جواب کائنی
کتھوں شروع کیتے وی
کتھاں توں کم مکائے وی
بہوں ساری توں لکائی وی
تھوڑی جئیں ڈکھائی وی
مخلوق تیڈی بہوں ہے
جہڑی ودھیندا ویندے
انسان گولی آندن
یا خود ڈیکھیندا ویندیں
اللہ نظام تیڈا
بیا کوئی چلا نی سگدا
تو ہی ہیں ایندا خالق
بیا کوئی بنڑاں نی سگدا
اللہ جو توں نہ چاہویں
کوئی پتہ ہلا نی سگدا
مر گئے جہڑا پرندا
کوئی واپس ولا نی سگدا
اللہ توں کاریگر ہیں
کائنات کوں بنائے وی
پانی ہے آہروں باہروں
پانی دے وچ کھڑائے وی
کیویں اے چندر تارے
کیویں اے سجھ بنائے وی
کیویں اے ہن سیارے
دنیا کوں توں ڈیکھائے وی
❤ یہودیاں دے ناں ❤
منکر وی تیڈے بہوں ہن،
شک او بہوں کریندن
ساڈی نی سنڑدے کوئی
ساکوں او بہوں ستیندن
دنیا تے حکم اپنا
ایویں او پئے چلیندن
جیویں اوہوے خدا ہن
ساکوں او پئے پلیندن
انہاں دے آکھے لگ تے
کعبہ وی بند تھیندے
کعبہ تاں سوہنی جا ہے
اللہ دا گھر سڈیندے
حج وی اُتھائیں تھیندے
سارے گناہ دھویندے
او ہے شفا دی جا
زم زم اُتھاں پیویندے
وائرس تاں ھے بیماری
بہوں ہن دوا جیندے
جہڑا حرام کھاندے
انہاں کوں اے تاں تھیندے
اللہ وحید تیڈا
بیٹھا اپنے ہنجو پیندے
تئیں توں یقین اُٹھ گئے
کمزور ہن عقیدے
اللہ ڈکھا چا کوئی
ہُن معجزہ توں اپنڑاں
دنیا دے اے یہودی
پڑھن بیٹھے تیڈے قصیدے
❤ساڈے ڈو خدا جو ہوندے❤
کائنات اپنی اپنی
انج انج چا او بنڑیندے
ڈوہیں نظام رل تے
انج انج او چلیندے
ساڈے ڈو خدا جو ہوندے
ہک بئے کوں روز پوندے
قرآن کوں پڑھوں تاں
قرآن اے ڈسیندے
کائنات ڈوہیں رل تے
برباد چا کریندے
ہکو ہے ساڈا اللہ
جیندے سجدے ہیں کریندے
بیا کوئی نی ساڈا خالق
نہ کہیں بئے کوں ہیں منیندے
❤ کفر ❤
بابل دا بادشاہ ھئ
دعویٰ ھئی او کریندا
کہ بس اوہو خدا ہے
لوکاں کوں ھئی ڈریندا
نمرود اوندا ناں ھئی
گالھیں ھئی بہوں کریندا
ابراھیم اونکوں آکھیا
بس اتنا کم توں کر چا
اتنی توں ھامی بھر چا
مغرب توں سجھ کوں کڈھ چا
اوں گال اے سنڑیں تاں
شرمندہ تھی گیا او
اے یاد رکھو لوگو
اوندا نشان کائنی
پتہ نی کتھ گیا او
برباد تھی گیا او
❤اللہ سوال پچھدے❤
ناں ڈسائو ہوندا
نطفے کوں کئیں بنڑائے؟
نطفے دے نال انساں
بندے کو کئیں بنڑائے؟
ناں ڈسائو ہوندا
بیجاں کوں کئیں بنڑائے
بیجاں دے نال انساں
پودے کوں کئیں بنڑائے
ناں ڈسائو ہوندا
پانڑی کوں کئیں بنڑائے
بادل توں ول انساں
پانڑی کوں کئیں وسائے
ناں ڈسائو ہوندا
لکڑ کوں کئیں بنائے؟
لکڑ دے نال انساں
بھا کوں کئیں بنڑائے
اللہ سوال پچھدے
❤سورۃ اخلاص دا پیغام❤
محمد کوں حکم تھیندے
لوکاں کوں او ڈساون
اللہ دی ذات ہک ہے
دھوکے دے وچ نہ راہون
او نی اولاد والا
کہیں نال نہ رلاون
اوندا نی کوئی ہمسر
اوندے نی کوئی سہارے
او نی محتاج کہیں دا
محتاج اوندے سارے
پیندے گناہ تے پردے
اوندی ہے بے نیازی
توبہ جو کوئی منگے
تھی ویندے اوں توں راضی
❤ ساڈے عقیدے ❤
عقیدے کوں عقد آہدن
مطلب جیندا نکاح ھے
شادی وی ھے عقیدہ
کہیں توں نہ اے لکاہے
عقیدہ ہے بیج سوہواں
ودھیندا جینکوں اللہ ھے
حاکم عقیدہ دل دا
سوچاں دا بادشاہ ھے
سینانڑے تاں اے وی آھدن
ڈکھیندا عقیدہ راہ ھے
عقیدہ ایمان ہک ھن
مطلب وی نہ جدا ھے
عقیدے دا میڈا سوہنڑاں
ایمان ڈوجھا ناں ھے
جہڑا اللہ دا تھی گئے
مومن اوہو اتھاں ھے
ٹردے گناہ توں بچ کے
ویندا جتھاں جتھاں ھے
کریندے عبادتاں او
گھندا اللہ دا ناں ھے
آدم دے بعد جتنے
پیغمبر اللہ نے بھیجے
سارے ڈسیندے رہ گئے
اللہ کتھاں کتھاں ھے
جتنے وی شرک لوگو
دنیا تے تھیندے رہ گئے
اللہ نے بھیجے بندے
اپنڑے اتھاں اتھاں ھے
ساڈے نبی توں پہلے
جتنے رسول آئے
سب تے یقین ساڈا
انکار کہیں توں نہ ھے
ہک کوں جو نہ منیسوں
جاں ول اللہ کوں ڈیسوں
فائدہ نی زندگی دا
بچسوں نہ کر گماں ھے
ابراھیم دے صحیفے
تورات موسی والی
دائود زبور والا
انجیل عیسیٰ والی
ساڈا نبی تاں لوکو
پیندا ھئی کملی کالی
لتھا قرآن اوں تے
قرآن دا او والی
ہر ہک کتاب تیڈی
ہر ہک نبی وی تیڈا
توں مالک ہیں ڈو جہاں دا
اے وی جہان تیڈا
تیڈے در تے آیاں بیٹھاں
خطا کار ھاں مئیں جیڈا
رستے نبی دے ٹرساں
پڑھساں قرآن تیڈا
اللہ توں معاف کر چا
توں ہیں رحمن کیڈا
کوئی تاں کم ہوسی
معافی دے قابل میڈا
❤آخرت دا منظر❤
آسی ڈیہاڑا او وی
دنیا فنا اے تھیسی
اپنڑی قبر توں بندہ
اوں روز ول اُٹھیسی
ڈیہاڑا حشر دا ہوسی
گنہگار بہوں روسی
ہوسی اوں روز کلہا
اوندے نال کوئی نہ ہوسی
مخلوق کٹھی ہوسی
اعمال پیش تھیسن
ترکڑی دے وچ پا کے
اعمال پئے تُلیسن
ہک پاسے ہوسی نیکی
ہک پاسے گناہ کوں پیسن
فرشتے اعمال چا چا
بندیاں کوں پئے ڈیکھیسن
او ویلھا اوکھا ہوسی
سارے بھار اپنڑاں چیسن
بدلے وحید بندے
اپنڑے اپنڑے ڈیسن
جیندے اعمال زیادہ
چنگے تولیج ویسن
بخشش انہاں دی ہوسی
جنت دے وچ او ویسن
جہڑے گناہ زیادہ
دنیا توں کر کے ویسن
مئیں توں قسم چوا گھن
دوزخ دے وچ سٹیسن
فرشتے وی اللہ دی
مخلوق ھے نورانی
عقیدہ توں رکھ انہاں تے
نی کوئی انہاں دا ثانی
فرشتے توں زیادہ اللہ
آدم کوں ھئی سکھایا
نہ ہن او جئیں توں واقف
آدم کوں ھئی ڈسایا
مومن وحید او ہے
عقیدہ ہے جیندا پکا
بھج تے پُل او ٹپسی
ویسی نہ او کپا
منت ہے میڈی انساں
کلمے کوں یاد کر گھن
رستہ ودیں جو بھلیا
اج اونکوں یاد کر گھن
رستہ تیکوں ڈکھیسی
سدھے راہ تیکوں لیسی
سجدے وحید اونکوں
تہجد دے بعد کر گھن
❤ شرک ❤
حاجت روا ھے اللہ
مشکل کشا ھے اللہ
گھاٹے وی اوہو ڈیندے
فائدے وی او پچیندے
منگو اللہ توں لوکو
اوہو عطا کریندے
تھوڑی دیر تھی وی پووے
لیکن ضرور ڈیندے
عبادت کروں تاں ہوندی
نہ خیال کوئی ہووے
اکھیں نوٹ کعبہ ڈیکھوں
خالق وی نال ہووے
پتہ نہ لگے کہیں دا
دل دا اے حال ہووے
جٖٖڈاں سلام پھیروں
نہ دل وچ ملال ہووے
نمازاں دے وچ اپنڑی
کہیں بئے کوں جو سوچیسوں
ظالم اساں سڈیسوں
نقصان بہوں چیسوں
ساڈی نماز ساکوں
فائدہ ذرا نہ ڈیسی
اللہ ولھیٹ تے او
ساڈے منہ تے مار ڈیسی
شرک دے علاوہ
بئے جتنے وی گناہ ہن
بھاویں او ہن سمندر
یا او بے پناہ ہن
جیکوں وہ اللہ چاہسی
اونکوں چا ڈیسی معافی
شرک او گناہ ہے
جیندی نی معافی کوئی
مشرک کیتے تاں لوگو
سزا نی کافی کوئی
دوزخ دا بل او بنڑسن
او بھاہ دے وچ سٹیسن
حشر دے ڈینہہ او سارے
ڈھاڑیں مار مار روسِن
❤ مشرک دی مثال ❤
جیویں اتوں کوئی ڈھاندے
کھجی دے وچ آ پوندے
بیا کجھ او کر نی سگدا
دھاڑیں مار مار روندے
اوندے سر تے پکھی وَل وَل
ٹھنگے پئے ہن مریندے
جو ڈھاندے کھجی اتوں
سدھا منڈھ دے وچ آ پوندے
منڑکا بھنیج پوندے
مردا نی بچ پوندے
منڈھ دے وچ مشکی
نانگ بیٹھا ہوندے
نانگ اونکوں لوگو
ڈنگ چا مریندے
لوک اونکوں چا تے
جوگی دے کول ویندے
جہڑا جلدی جلدی
اوندی لت چا کپیندے
مشرک بچ پوندے
سارے شکر کریندے
❤حضرت عمر فاروق رضی اللہ تعالیٰ عنہہ دا ہک واقعہ❤
کوشش کریساں مشکل
میڈی گال کوئی نہ ہووے
آسان لفظ ہو ون
مشکل کوئی نہ پووے
محفل حضور دی ھئی
بیٹھا صدیق وی ھئی
فاروق وی ھئی اوں جا
بندہ نہ بیا کوئی ھئی
فاروق بیٹھا پڑھدے
تورات دا صحیفہ
تحقیق پئی ھئی تھیندی
پرانڑاں ھئی بہوں صحیفہ
چہرہ حضور دا
صدیق ڈٹھی بیٹھن
حضور بیٹھے چپ ہن
کاوڑ وی کیتی بیٹھن
صدیق آہدے فاروق
کہڑی نیت توں نیتی بیٹھیں
حضور کوں وی ڈٹھی
جہڑےکم توں کیتی بیٹھیں
فاروق ڈیھدے چہرہ
سرکار دا نورانی
تورات چھوڑ ڈیندے
کوڑی جو ھئی کہانی
فوراََ فاروق آہدے
بھل مئیں توں تھی گئی ھے
منگداں مئیں سوہنڑاں معافیی
منگداں مئیں سوہنڑآں معافی
میڈے کیتے تاں اللہ
تے اوندا رسول کافی
❤ ہُن نبی دی وی گال سنڑو جو او کیا ارشاد فرمیندن ❤
فاروق یاد رکھیں
اے زمانہ قرآن دا ھے
موسی وی نبی ھئی
لیکن بندہ رحمن دا ھے
اج موسیٰ جو آپ ہوندا
او وی قرآن پڑھدا
جتھ ہا مئیں کھڑاواں
او وی اتھائیں کھڑدا
سنڑ تے نبی دی گال
عمر بچدے مردا مردا
سنڑدا بیٹھے گالھیں
نبی توں ڈردا ڈردا
دنیا اندھیر نگری
رستہ ڈیکھا توں اللہ
اساں ہیں ڈردے کلھے
ساکوں نہ چھوڑیں کلھا
❤ساڈے وعدے❤
اساں تاں اللہ تیڈا
قرآن پڑھدے راہسوں
بے شک رحمن ہیں توں
اساں ول وی ڈردے راہسوں
سنڑسوں آذان تیڈی
کم کار چھوڑ ڈیسوں
پہلے نماز پڑھسوں
کم بعد اچ کریسوں
برکت دا ہیں وسیلہ
اللہ کریم ھیں توں
تئیں توں شفا ھے ملدی
اللہ رحیم ہیں توں
اقتدار تیڈا اللہ
سارے جہان تیڈے
خالق ہیں ڈو جہاں دا
ساکوں تاں مانڑ تیڈے
محشر دے ڈینہہ دا مالک
اللہ دی ذات ہے
مخلوق دا ہیں خالق
تیڈی کیا بات ھے
❤سورۃ العصر دا پیغام (اللہ دا اعلان)❤
العصر ہے زمانہ
یا عصر دی نماز ھے
اللہ نے قسم کھادی
کھولو سی راز اے
جیندا ایمان ھے
میڈی توحید تے
رسول دی رسالت
میڈی نوید تے
اعمال جیندے سوہنڑے
پڑھدا قرآن ھے
کم اوہے او کریندے
جہڑے آہدا رحمن ہے
سنت کوں نی چھوڑیندا
قرآن پڑھدا راہندے
راتاں کوں رووے جہڑا
اللہ توں ڈردا راہندے
بیاں کوں ڈیندے دعوت
تبلیغ او کریندے
شہرت وی اللہ ڈیندے
مبلغ وی او سڈیندے
صبر دا بنڑدے پیکر
استقلال وی رکھیندے
اللہ دی راہ تے ٹردے
مصیبتاں جھلیندے
اے کامیاب تھی گن
جنت دے وچ رکھیساں
جتنے وی ہن باقی
بھا وے وچ سٹیساں
❤ قرآن ❤
قرآن دے گالھیں پلے پا گھن
خود کوں سدھے راہ توں لا گھن
قرآن کوں نہ توں سمجھیں سادہ
عاشق ایندے سب توں زیادہ
حافظ ٹردے ورد کریندے
روز قرآن دا ختم ڈیندے
چھ سو ڈاھ کوں یاد رکھیں تو
پہلی وحی نازل تھئی ھئی
شاہی ڈو جہاں دی اللہ
محمد کوں ڈے ڈیتی ھئی
ایں موقعے لوگو ڈیکھو
محمد سنویں ذات وی ڈر گئی ھئی
ول ہولے ہولے عادت تھی گئی
ول وحی دل دی راحت تھی گئی
ول جو فرشتہ آوے ھا
وحی او سنڑاوے ھا
ول وحی کتھاں بھلدی ھئی
یاد او ساری راہوے ھا
صحابہ وی وحی لکھدے ہن
محمد خود وحی سنڑدے ہن
ول پئی تلاوت تھیوے ھا
وحی مرداں وچ لکھیوے ھا
ول رناں لکھنڑ آون ھا
قرآن کوں سکھنڑ آون ھا
راتاں دے جو او کھڑدے ہن
اللہ دی وحی پڑھدے ہن
رمضان وی ایویں آندا ھئی
خوف اللہ دا راہندا ھئی
رمضان دے وچ خود آپ نبی
قرآن دا پھیرا ڈیندے ہن
صحابہ وی نہ بھلدے ہن
وحی یاد رکھیندے ہن
او وی آخر ویلا آیا
سوہنڑے چا ھئی منہہ لکایا
صدیق نے وڈا کم اے کیتا
زور جو ھئی اونکوں اللہ ڈیتا
زید دے ذمے لایو نے
قرآن انہاں چا اکٹھا کیتا
ڈُکھ وحید اے دل اچ راہسی
جبرائیل زمین تے کینا آسی
❤ نماز ❤
اسلام وچ پہلے نماز فرض ھے
ادا نہ اے کریسوں تاں راہسی قرض اے
قرآن ساکوں آہدے
توجہ ذرا کرو
خدا کوں یاد رکھو
ایں توں ڈرا کرو
نماز اویں پڑھسوں
جیویں سکھا ڈتے
سوہنڑے نے زندگی دا
سلیقہ ڈسا ڈیتے
کیویں رکوع دے وچ
اساں قیام کرنڑے
کیوں کریسوں سجدے
کیویں سلام کرنڑے
اللہ دی بارگاہ اچ
مسلمان سارے ہک ہن
امیری نہ مفلسی ہے
انسان سارے ہک ہن
جانڑ تے جو کوئی، نہ نماز پڑھسی
اوندا حساب تھیسی، کافر دے نال کھڑسی
تیڈا بت جو پاک کینی
پہلے وضو تو کر گھن
جو غسل تو نی کیتا
پہلے توں غسل کر گھن
سوچاں کوں پاک کر گھن
نیت کوں ٹھیک کر گھن
ول ہے تیکو اجازت
اپنڑی نماز پڑھ گھن
❤ زکوۃ ❤
زکوۃ پاک پانڑی
ساڈا مال پاک کر گئے
میلا ذری نہ ریھا
چاندی دے وانگ کر گئے
داغی کیتھائوں کینی
چٹے کپڑے وانگ کر گئے
ڈیدھے ہیں مال اپنڑاں
دل باغ باغ کر گئے
اللہ توفیق ڈیویں
ایویں مال دھوتی رکھوں
زکوۃ دی اے مالا
ساری زندگی پوتی رکھوں
ہیندے طفیل ساکوں
اللہ بخت لائی رکھیں
نہ ڈُکھ کوئی نیرے آوے
اللہ بچائی رکھیں
مقرر جہڑی توں کیتی
زکوۃ اساں ڈیسوں
نہ کہیں غریب دا
حق اساں رکھیسوں
پیسہ ہے جتنا میڈا
اللہ تیڈی عطا ہے
ڈیساں زکوۃ تیڈی
ڈیساں تئیں توں وتا اے
میڈے جتنے ہن زمیناں
جتنی جاگیر میڈی
جو کجھ ہے میڈا اللہ
ساری مہربانی تیڈی
عشر ضرور ڈیساں
پورا پورا نپیساں
جتنا بنڑدے میڈا
حساب پورا ڈیساں
میڈے جتنے مال ڈھانڈے
زکوۃ سب دی ڈیساں
توں جانڑدا ہیں سب کجھ
تئیں توں کیویں لُکیساں
اپنڑاں فضل اللہ
وحید تے قائم رکھیں
ایویں اے سلسلہ
قائم و دائم رکھیں
(آمین)
❤ روزہ ❤
ناواں ھے اے مہینہ قمری سال دا
افضل ہےجتنا اے، اتنا بیا کوئی نہ
عربی زبان اچ
اینکوں صیام آہدن
ماہ صیام ہے اے
اللہ دا توں ناں گھن
صوم ہے او گھوڑا،
سارا ڈینہہ او بکھا کھڑدے
او اویں تیار تھیندے
جنگاں دے وچ او لڑدے
صوم توں اے نکلے
ماہِ صیام تھی گئے
اللہ دا ایں مہینے
بندہ مہمان تھی گئے
سحری کریسوں آپاں
روزے رکھیسوں آپاں
اللہ دا حکم تھیسی
روزے کھولیسوں آپاں
سارے نمازاں پڑھسوں
سجدے پئے کریسوں
پڑھسوں قرآن تیڈا
تیڈے نال پئے الیسوں
راہسوں گناہ توں بچ کے
گنہگار نہ پئے ہوسوں
چھوٹے گناہواں توں وی
خود کوں اساں بچیسوں
بکھیاں دے نال بیہہ کے
روزے اساں کھولیسوں
جتنی توفیق ہوسی
بکھیاں کوں وی کھویسوں
اللہ توں ڈیندا راہویں
اساں کھویندے راہسوں
جتنا وی زیادہ ڈیسیں
اساں ونڈیندے راہسوں
اللہ نماز روزے
ساڈے قبول کر گھن
وحید کوں ڈے معافی
اپنڑے توں کول کر گھن
❤ حج ❤
جیویں کوئی ارادہ یار کریندے
یار دی زیارت یار کریندے
حج وی بس ایں توں ملدا جلدا
اپنڑاں مطلب آپ رکھیندے
بیت اللہ ونج تے بندہ جہڑا
اللہ راضی کر گھندے
رحمت اوندی پندے بیٹھا
پن پن جھولی بھر گھندے
رو رو ہنجواں نال او کپرے
کر اپنڑے سارے تر گھندے
ایں گالھ اچ وحید کوئ شک کائنی
او حج ایں سمجھو کر گھندے
میقات تے ونج تے نیت کرنڑی
احرام وی بدھنڑاں ضروری ھے
کوئی گال کہیں نال کرنڑی نی
جہڑی غیر ضروری ھے
، میں حاضر ھاں مئیں حاضر ھاں
تلبیہ تیکوں کرنڑاں پوسی
راہویں بیت اللہ توں پرھاں پرھاں
تیکوں چکر وڈا کرنڑاں پوسی
جو جتنا وڈا چکر ہوسی
اتنا زیادہ ورد کریسیں
جو جتنا زیادہ وحید توں روسیں
ثواب وی اتنا ملدا ویسی
طواف جو تیڈا پورا تھیسی
ول دل وچ بہوں ارمان اٹھیسی
ڈو نفلاں دی نیت کرنڑی پوسی
کوئی سورت وڈی پڑھنی پوسی
منتاں ترلے وی پئے ہوسن
اللہ راضی کرنڑاں پوسی
صفا مروہ دے ست چکر لیسیں
سعی وی تیکوں کرنڑاں پوسی
بی بی جیہویں بھجدی رہ گئی
اویں تیکوں بھجنڑاں پوسی
اج رات گزرسی مکے وچ
قیام اتھائیں کرنڑاں پوسی
منی دے میدان وی ونجڑاں پوسی
راہونڑ دا انتظام وی کرنڑاں پوسی
اے رات عبادت وچ لنگھ ویسی
کتھاں سُم پوونڑ دی فرصت ہوسی
میدان عرفات وی انجنڑاں پوسی
وقوف وی تیکوں کرنڑاں پوسی
سجھ نال پئے آپاں رمی ویسوں
تھوڑی جئیں نہ دیر لیسوں
شیطان کوں پتھر رج رج کے مریسوں
منیٰ آپاں پئے واپس ویسوں
جہڑی توفیق اللہ ڈیسی
اللہ دے ناں قربان کریسوں
قربانی کر کے سر منڈویسوں
ترائے ڈینہہ آپاں ایں گزریسوں
ول پئے آپاں کعبے ویسوں
رج رج کے طواف کریسوں
مار کے دھاڑیں روندے راہسوں
ہوش نہ ہوسی بھوندے راہسوں
ملتزم کوں ایویں چھوڑ نہ ڈیویں
کیتی کرتی بوڑ نہ ڈیویں
ول مکہ چھوڑ مدینہ ویسوں
سوہنڑے کوں دل دا حال سنڑیسوں
رو رو دل دا حال سنڑیسوں
روندے روندے چپ نہ تھیسوں
رویں وحید توں اتنا رویں
روندے روندے توں مر پوویں
❤ جہاد ❤
عربی زبان دا
ہک لفظ جہد ھے
جیویں اُردو زبان اچ
جدوجہد ھے
جتھاں زور پورا لیسوں
اونکوں جہد اکھیسوں
محنت بہوں کریسوں
جدوجہد اکھیسوں
جتھاں اے زور سارا
اسلام پچھوں لگدے
آزاد تھی ونے کوئی
غلام پچھوں لگدے
کافر جو کوئی ستیسی
کہیں مسلمان کوں
یا نقصان کوئی پُچیسی
صاحب ایمان کوں
جتھاں کوئی کہیں کوں
کلمہ پڑھن نہ ڈیسی
رکیسی اوندا رستہ
مسیت وننڑ نہ ڈیسی
جتھاں کوئی مسلماں
کافر دے ہتھوں مردے
جتھاں کوئی انساں
کافر دے ناں توں ڈردے
اتھاں جہاد فرض ہے
اتھاں جہاد تھیسی
گال جہڑی ہوسی
طاقت دے نال تھیسی
جب تک نہ ظلم مکسی
جہاد تھیندا راہسی
جہڑا مریسی کافر
غازی سڈیندا راہسی
❤ مسلماناں دا خلیفہ ❤
ساڈا خلیفہ او ہے
جہڑا قرآن پڑھسی
اللہ دے سوا او
بیا نہ کہیں توں ڈرسی
سنت حدیث دی او
خود مثال ہوسی
اعمال چنگے ہوسن
او باکمال ہوسی
عالم او دین دا
عادل وی نال ہوسی
ہر گالھ سچ اوندی
کوڑی نہ گال ہوسی
مسلمان ہوسی پکا
پکا ایمان ہوسی
دین تے او چلسی
ساڈی او شان ہوسی
مظلوم کوں بچیسی
اونکوں پناہ وی ڈیسی
روٹی وی ڈیسی اونکوں
راہونڑ دی جاہ وی ڈیسی
ظالم کوئی اوں توں
خود کوں بچا نہ سگسی
سنڑسی نہ گالھ اوندی
رستے نہ کہیں دے لگسی
جہڑے نشہ وچیندے
او وی نہ زندہ راہسن
ملسی انہاں کوں پھانسی
چوکاں تے لٹکے راہسن
جہرے کریندے چوری
چوری او چھوڑ ویسن
جہڑے نہ اے چھوڑیسن
ہتھ کٹیج ویسن
جہڑے زنا کریندے
او وی سزا بھوگیسن
زانی دے سر کپیسن
انصاف ول پئے تھیسن
کافر تے اے یہودی
مایوس اوں توں راہسن
اوں تے نہ زور چلسی
ہاں اپنڑاں بیٹھے کھاسن
سازش ناکام تھیسی
دشمن شکست کھاسن
مندر مسیت بنڑسی
پتھر دے بت وی ڈھاسن
اسلام پھیل ویسی
فرقے نہ کوئی راہسن
سارے جو ہک سڈیسن
دشمن وی ڈردے راہسن
شریعت کریسی لاگو
نہ بیا کوئی نظام ہوسی
قرضے نہ سود ہوسن
اسلام عام ہوسی
❤ کفر توں انکار ❤
جہڑا توں سکھائے وی
بیا نہ طریق ہوسی
تئیں نال میڈا اللہ
نہ کوئی شریک ہوسی
کوئی گناہ نہ چھوڑے
کیتے گناہ مئیں کافی
اللہ پناہ مئیں منگداں
ڈے چا تو میکو معافی
کلمے تے راہساں اللہ
کافر مئیں نہ سڈیساں
پڑھساں نماز تیڈی
مسلمان بنڑ کے جیساں
اللہ میکوں بچا گھن
میں شرک کر نی سگدا
ہوواں مئیں بندہ تیڈا
مشرک مئیں مر نی سگدا
باہیں دے وچ دھاگے
ہن نہ مئیں بدھیساں
اللہ مئیں منگساں تئیں توں
بدت نہ مئیں کریساں
جو گالھ ہوسی کوئی
نہ کوڑ مئیں مریساں
نقصان بھانویں ہوسی
گالھ سچ کریساں
غیبت وی میڈا اللہ
ہُن نہ کہیں دی تھیسی
ڈے چا توں میکو معافی
کیویں وحید جیسی
کوشش اساں کریسوں
تعبیدار بنڑ کے راہسوں
ماں پیئو کوں ڈُکھ نہ ڈیسوں
ھاں ٹھار بنڑ کے راہسوں
دنیا جو بے حیا ہے
اساں بے حیا نہ بنڑسوں
اساں بنڑسوں اللہ تیڈے
صاحب حیا بنڑسوں
❤ سورۃ فیل دا واقعہ ❤
یمن دا بادشاہ ھئی
ابرہہ ھئی سڈیندا
کعبہ سنواں گھر
اونکوں نہ ھئی ڈِسیندا
اوں اپنڑی سلطنت اچ
ہک گرجا گھر بنڑایا
اوں گرجا گھر بنڑا کے
اعلان ھئی کرایا
ہُن اے خدا دا گھر ہے
سارے اِتھائیں آون
ہُن حج اتھائیں تھیسی
سارے اتھائیں راہون
پیغام ابرہہ دا
مکے وی آگیا
برباد تھیا ہوسی
جہڑا ھئی چا گیا
ہک عربی چھوڑے مکہ
اوندے شہر آگیا
پہنچے اوں گرجا گھر اچ
گندگی پھیلا گیا
ابرہہ کوں لگدے پتہ
آپے توں باہروں تھیندے
بدلہ کیویں گھناں ہُن
مردے تے نہ او جیندے
لشکر تیار تھیندے
جو زندہ نہ ہک چھوڑیساں
حملہ کریساں مکے
کعبہ کوں وی سٹیساں
فوج گھن تے ہاتھی
مکے روانہ تھی گئی
نہ اوں ارادہ بدلے
کاوڑ وی اندی نی گئی
اوندی فوج پہنچی مکے
ڈھانڈے سارے بدھ گھدونے
نہ انہاں چھوڑی کوئی بکری
سارےاُٹھ وی بدھ گھدو نے
ڈاڈا حضور دا ھئی
ملدے ابرہہ کوں ونج تے
آہدے ڈھانڈے تو ولا ڈے
کعبہ کوں بھاویں بھن ڈے
گھر ہے کعبہ جیندا
آپے اوہو بچیسی
توں ساڈی منڑی کینی
تیکوں اوہو ڈسیسی
ابرہہ گالھ سنڑدے
آہدے ڈھانڈے سارے گھن ون
مکہ کوں خالی کر ڈے
بندے وی نال گھن ون
سارے ایویں کریندن
مکہ کوں چھوڑ ڈیندن
چڑھدن پہاڑاں تے او
غاراں دے وچ پہہ ویندن
ہن فوج ہاتھیاں دی
حملہ ہے پئی کریندی
ابرہہ دا ہاتھی باہندے
ہے فوج پئی اُٹھیندی
ہاتھی جو باہندے اُتھاں
کوئی اُٹھا نی سگدا
کعبہ سٹیسی کیویں؟
جہڑا ہاتھی ہلا نی سگدا
اتھاں پتہ ایہو لگدے
ابابیل پہنچ ویندن
پتھر انہاں کوں اُتھاں
ابابیل پئے مریندن
لشکر او ہاتھیاں دا
سارے ہلاک تھی گئے
بچا نہ کوئی زندہ
سارے ہلاک تھی گئے
ابرہہ دی فوج ساری
بوٹی بوٹی تھی گئی
اللہ دی دشمنی اچ
ٹوٹے ٹوٹے تھی گئی
حالی رسول دا
ظہور نہ ھئی تھیا
دشمن اللہ دا کوئی
نہ مکے زندہ ریھا
❤حضرت ابو بکر صدیق نال محبت رسول دی❤
رسول ہاں مئیں تیڈا
اللہ دا مئیں نبی ھاں
صدیق سنڑداں بیٹھیں
شک مئیں تے کریں نہ
سوہنڑے نے جو ڈسایا
اپنڑے صدیق کوں
صدیق گل چا لایا
سوہنڑے حبیب کوں
پہلا ھئی مرد مومن
اسلام وچ او آیا
خلیفہ وی ھئی او پہلا
اسلام کو پھیلایا
پیغام اوں اللہ دا
ہر کہیں کو ڈتے لوگو
جے تئیں او زندہ ریہا
کم ایہو کیتے لوگو
صدیق جینکوں ڈیندا
اسلام دی ھئی دعوت
اوہو پڑھے ہا کلمہ
ملے ہا اونکوں راحت
جتھاں صدیق کو
غلام کہیں دا ملدا
اوں کافر کو ونج ملے ھا
غلام مل ھئی گھندا
ایوں غلام او
آزاد ھئی کریندا
غلاماں کو زندگی دے
انداز ھئی سکھیندا
جتھاں جتھاں نبی کوں
کافر ستیندے رہ گئے
اُتھاں اُتھاں صدیق
ساتھ ڈیندے رہ گئے
ہجرت نبی کریندے
صدیق نال ہوندے
اُٹھاں تے ڈوہیں باہندن
جاہ و جلال ہوندے
مکہ توں ہُن او نکے
غارِ ثور پہنچ ویندن
پڑھدن نماز اُتھاں
آرام اُتھ کریندن
عبداللہ وی آندا راہندے
خبراں سنڑائی رکھدے
عامر وی غار ڈیہدے
پلائی کھیر رکھدے
ترائے ڈینہہ سوہنڑے
اتھائیں قیام کیتے
غارِ ثور کو وی
اعلی مقام ڈیتے
کافر گولیندے سوہنڑا
غار تک وی آئے ہن
مکڑی نے ڈتا دھوکا
ارادے خاک تھئے ہن
اگوں فاختہ ھئی بیٹھی
انڈے وی اوں لہائے ہن
بندے ڈوہیں اپنڑے
اللہ نے ایں بچائے ہن
سراقہ نے وی بئے ڈینہہ
جلوے خدا دے ڈیٹھے
گھوڑے دے پیر اوندے
زمین نے چا قابو کیتے
محمد تے اوندا نوکر
مدینہ پہنچ ویندن
اللہ دے دین دی او
بنیاد چا رکھیندن
جیویں صدیق مکے
مال ھئی لٹایا
اپنڑی ذات کیتے
اوں کجھ نہ ھئی بچایا
اسلام دا ھئی خادم
اوندی کیا شان ھئی
اسلام کیتے حاضر
اوندی تاں جان ھئی
غزوہ بدر دے وچ وی
خدمت گزار ھئی
پہرا کھڑا او ڈیندے
بہوں تعبیدار ھئی
قیدیاں دے بارے
پیا مشورہ ھئی تھیندا
ڈیکھو رسول کیندی
گالھ ہے منیندا
عمر تاں آہدے
دشمن اسلام ہن اے ساے
اِنہاں نے کتنے مومن
بے دردی نال مارے
قتل اےمیڈے ہتھوں
سارے دے سارے تھیسن
مئیں خود قتل کریساں
مئیں ڈیدھاں اے کیویں جیسن
صدیق آہدے معافی
انہاں کوں ڈیندے ہئیں
فدیہ انہاں دا گھن تے
آزادی ڈیندے ہئیں
رسول ڈو جہاں وی
صدیق دی منیندے
فدیہ گھن تے قیدی
آزاد چا کریندے
(ہک بئے موقع تے رسول حکم فرمائے)
توجہ کریسو
سوہنڑاں آہدے صدیق
امامت اج تو کریسیں
طبیعت ذرا ناساز ہے
نماز توں پڑھیسیں
صدیق آہدے عمر
اج جماعت تاں کرائو
کھڑسوں پچھوں تہاڈے
نماز تاں پڑھائو
رسول آہدن کائنا
نماز توں پڑھیسیں
مئیں صدیق آکھیے تیکوں
جماعت توں کریسیں
آخر صدیق سوہنڑے دی گالھ من گھدو سی
سوہنڑاں نال کھڑ گئے صدیق اللہ اکبر کیتو سی
بارھاں ربیع الاول دا ڈینہہ وی آگیا
روح کڈھ محمد دی فرشتہ چا گیا
آخر رسول وی اے جہان چھوڑ ویندے
دنیا تے او باقی، اسلام چھوڑ ویندے
جیویں رسول آکھیے
صحابہ فرض ادا کیتو نے
مدینے وچ سوہنڑے کوں
دفنا ڈیتو نے
پہلا خلیفہ لوکاں صدیق کو ں بنڑایا
صدیق پورا پورا فرض ھئی نبھایا
سو ڈو سال دا
اے سارا زمانہ ھئی
خلافت دا دور اے
لوکو شاہانہ ھئی
نبوت دے دعوے دار وی ڈھیر تھی گئے
دشمن صدیق دے چوفیر تھی گئے
خالد بن ولید نے وی فرض ادا کیتا
کوڑے نبی مار کے، سارا قرضہ لہا ڈتا
منکر زکوۃ دے وی ذرا خوف کھا گئے
زکوۃ چا کے اپنڑی خود بیت المال آ گئے
فتنے اوں دور دے سارے ختم تھئے
آسان دین دے سارے کم تھئے
وصیت صدیق دی عثمان لکھ گھدی
عثمان نے عمر کوں پڑھ تے سنڑاں ڈتی
آخر صدیق کوں وی اللہ سڈا گھدا
محبوب نال آپ کوں آخر ملا ڈتا
موت ڈیویں مہلت وحؔید کوں توں اتنی
سجدہ کریندے ہوئے لگدی ہے دیر کتنی
❤حضرت عمر فاروق رضی اللہ تعالی عنہ❤
اللہ دی بارگاہ اچ
دعا منگیندی پئی ہے
اللہ دے نال عمر بارے
گال تھیندے پئی ہے
اللہ رسول دی دعا کوں پورا کیتے
جو منگے رسول نے، اللہ عطا چا کیتے
جو نہ ڈیندا توفیق اللہ
عمر کیا کرے ھا
اسلام وچ نہ آندا
کلمہ وی نہ پڑھے ھا
بھینڑ دا تاں بس بہانہ بن گیا ھئی
عمر رسول دا خود دیوانہ بن گیا ھئی
ویندے عمر رسول دی خدمت اچ پیش تھیندے
پڑھدے او کلمہ حق دا، فاروق او سڈیندے
عمر سوچیندے کیندے
ونج ہوش مئیں اُڈاواں
دشمن ہے وڈا جہڑا
ہونکوں مئیں ونج ڈساواں
ابو جہل دا ناں
ذہن وچ آندے
چا چا ھئی او عمر دا
اے وی خیال راہندے
عمر ابو جہل دا دروازہ ونج کھڑکیندے
کلمہ اوں پڑھ گھدے، اطلاع اے اونکوں ڈیندے
ایندے بعد سارے قریش کوں دسیندے
ہر بندہ اوندے نال مقابلے کریندے
عمر کوں کوئی ہراوے
کہیں دی مجال نہ ھئی
ماہر ھئی او لنڑن دا
عمر وی بال نہ ھئی
نازک اے دور ھئی
مسلمان تھوڑے جئے ہن
لُک لُک نمازاں پڑھدے
دشمن انہاں دے سئے ہَن
عمر نے پڑھ تے کلمہ
ہر کہیں دا ڈر مکایا
مسلمانوں کیتے عمر
بیت اللہ ھئی کھلوایا
مکے توں مدینے
عجرت عمر کریندے
لُک لُک تے او نی آندا
اعلان کر کے ویندے
جرات نہ ھئی کفار دی
جو اوندے پچھوں ویندے
کافر تاں خؤد عمر توں
جان ہَن چھڑویندے
عمر وی بالاں بال مدینہ پہنچ ویندے
راہندے مدینے وچ، اتھائیں جان ڈیندے
گالھیں بہوں عمر دے
کوزے اچ بند کریساں
خود کوں وی ادب دا
پابند کریساں
وصیت صدیق دی
عثمان پڑھ سنڑائی
خلافت دی ذہ داری
عمر دے سر تے آئی
جیویں اللہ چاہندے
عمر اونویں کریندے
اسلام ہولے ہولے
دنیا اچ پھیل ویندے
ریاست فاروق دی ہے
اتھاں بادشاہی کائینی
بادشاہ تاں ہے
لیکن کوئی شاہی کائنی
رعایا تے بادشاہ ڈوہیں
ہکی جا تے باہندن
راہندے وی ہکی جا ہِن
ہکی جا تے کھاندن
عمر کوں جئیں نی ڈٹھا
سنجانڑ او نی سگدا
خلیفہ نال بیٹھے
پہچان کوئی نی سگدا
عدل و انصاف دی حکمرانی ھئی
عمر دے انصاف دی دنی دیوانی ھئی
عمر دے انصاف دا ہر پاسے شور ھئی
انصاف دا ھئی پیکر، عمر دا دور ھئی
ڈو نوجوان فاروق دے دربار آئے ہن
قاتل او اپنڑے پیو دا گھن نال آئے ہن
عمر پچھدے قاتل توں ، کیا ہے ماجرا؟
جہڑی گال سچ ہے، او گال تو ڈس
نوجوان آہدے الزام ہے مئیں تے سارا
مئیں پیو انہاں دا مارے، پر جانڑ تے نی مارا
پتھر مئیں اونکوں مارے
کاوڑ جو آ گئی ھئی
عقل میڈی ساری
کاوڑ کھا گئی ھئی
فاروق اونکوں آہدے
ڈس ہُن کتھاں ویسیں
قصور من گھدے وی
بدلہ ضرور ڈیسیں
جیویں تو قتل کیتے
اونویں قتل کریساں
مار تے مئیں تیکو
انصاف اج کریساں
نوجواب اپنڑاں سر سٹ ڈیتے
فیصلہ عمر دا اوں من گھدے
وارث مقتول دے وی ضد تے اڑ گئے
پیو جو انہاں شودیاں دا مر گئے
ہُن نوجوان عمر دی منت پیا کریندے
چھوٹے بھرا دے بارے عمر کوں او ڈسیندے
میڈے پیو نے میکو وصیت کیتی ھئی
بھرا دا خیال رکھیں نصیحت کیتی ھئی
سونا وی اوندا پورا ہویا چاونڑے
بھرا کو وی کہیں دے ذمے لاونڑے
مہلت جو میکوں ملے
اے کم مئیں کر گھناں
راضی مئیں ذات اللہ
دی وی کر گھناں
فاروق اونکوں آہدے ضمانت تو پہلے ڈیسیں
تیکوں مئیں ول چھوڑیساں، ول کتھائیں ویسیں
نوجوان مجمعے تے نگاہ پیا مریندے
ابوذر غفاری تے او رک ویندے
فاروق پچھدے ابوذر
کیا توں ضمانت ڈیسیں؟
ایں نوجوان تے توں
احسان اے کریسیں؟
ترائے ڈینہہ دی مہلت فاروق اونکوں ڈیندے
ضمانت تے نوجوان کوں فاروق چھوڑ ڈیندے
ہر کوئی ایہو سوچیندے
واپس او کائنا آسی
اے شہر چھوڑ ویسی
بھرا دے نال راہسی
مدعی وی آہدے رہ گئے
ضمانت کیوں ڈیتی؟
ابوذر غفاری توں
غلطی کر ڈیتی
فاروق آہدے مئیں وی
ول فیصلہ کریساں
جو او نہ آیا ول کے
سزا ابوذر کوں ڈیساں
پریشان سارے تھی گئے
کہ ہُن کیا کریسوں؟
ابوذر کوں سزا ملی تاں
کتھاں آپاں ویسوں؟
ہیں کشمکش اچ سارے پریشان تھئے کھڑے ہن
فاروق دے اعلان تے حیران تھئے کھڑے ہن
مدعائیاں دے منتاں ترلے
ہر کوئی پیا کریندے
معافی دی صلاح وی
ہر کوئی پیا ڈیندے
لیکن او کہیں دی گال سنڑن کوں تیار کائنی
ایویں پیا ھئی لگدا، ابو ذر نال پیار کائنی
کتھائوں شور اُٹھے
او ڈیکھو آ گئے
فرار او نی تھیا
او واپس آ گئے
سلام سارے مجمع کوں نوجوان کیتا
حیران سارے مجمع کوں نوجوان کیتا
بھرا دی ذمہ داری
مامے دے ذمہ لائی اے
کتھ ہے اوندا سونا
جا اونکوں ونج ڈکھائی اے
تھوڑی جو دیر تھئی ہے
میکوں کرائے معاف
بدلہ مئیں توں گھن تے
چا کرائے انصآف
مجمعے دے وچوں ابوذر باہروں آ نکلدے
ڈیکھ نوجوان کوں، حسرت دے نال کھلدے
وعدہ توں جہڑا کیتی
او سچا کر ڈتے وی
میڈا ایمان وی توں
پکا کر ڈے وی
تئیں نال میڈی کوئی وہ پہچان کائنا ھئی
جو ضمات تیڈی نہ ڈیندا، میڈی شان کائنا ھئی
ہر بندے کوں نوجوان حیران کر ڈتا
مدعیاں خود اتھائیں اعلان کر ڈتا
اساں پیو دے قاتل کوں معاف کر ڈتے
فاروق ساڈے نال انصاف کر ڈتے
کاوڑ جو ھئی ول وچ مدعئی پی گئے
اعلان سنڑ تے خوش سارے تھی گئے
❤حضرت علی رضی اللہ تعالی عنہہ❤
ناں علی ھئی اوندا
ابو الحسن ھئی کنیت
حیدر لقب ھئی اوندا
اسد اللہ سنویں سیرت
مکے دے وچ علی نے
تیرہ سال ہن گزارے
کوئی نال نہ ھئی اوندے
اللہ دے ہن سہارے
ڈیوے ھا نبی دا پہرہ
لگدے جو ہن او پیارے
جو تبلیغ او کرے ہا
اوندی گال سنڑدے سارے
غزوہ کوئی وی ہووے
او ھئی شیر بنڑ تے لڑدا
زخمی وی ھئی او تھیندا
دشمن توں نہ ھئی ڈردا
مشرک ولید کوں وی
حضرت علی نے مارے
عبیدہ کوں ونج بچیندے
کھڑے ڈیھدے اونکوں سارے
غزوہ بدر علی دی
اج تئیں گواہی ڈیندے
کیویں کوئی ہراوے اونکوں
نعرے اللہ دے لیندے
اُحد دے وچ علی نے
دشمن کوں ھئی نچایا
اساں ہار ویندے غزوہ
ساکوں ہار توں بچا یا
خندق عبور کر کے
عمرو جو پار آ گئے
آہدے مئیں لڑساں کلھا
تھی تے تیار آ گئے
اونکوں علی نے آکھیا
تئیں نال بس مئیں لڑساں
توں ہوسیں وڈا قاتل
تیڈے سامنڑے مئیں کھڑ ساں
ہک وار کر علی نے
اوندے ٹوٹے ڈو کیتے ہن
اے ڈیکھ تے یہودی
علی توں ڈر گئے ہن
خیبر فتح علی نے
لحظے دے وچ کیتا ھئی
مرحب کوں مار تے
ثابت اوں کر ڈتا ھئی
او شیر ہے اللہ دا
اللہ دی اوں تے عطا ھئی
❤حضرت علی رضی اللہ تعالی عنہہ دا ہک واقعہ❤
ہک خارجی علی توں پچھدے
مئیں اج کیا کھاساں؟
اوندی سوچ ھئی علی کوں
جھٹلا کے اج مئیں راہساں
اونکوں علی بشارت ھئی کھیر دی سنڑائی
خارج نے سوچا دل وچ ،اج ایں توں دور راہساں
گھر پہنچ کے او پچھدے
بھلا تھیوی کیا پکائے وی
خود تاں تو کھا گدے وی
میکوں وی کجھ کھوائے وی
بھر تے پیالہ لونڈی کھیر چا تے آ گئی
کھیر گھر پکا ھئی، بھر تے پیالہ آ گئی
خارج سوچیندے کیویں مئیں کھیر کھا گھنا
دشمن ہاں مئیں علی دا، کیویں یاری لا گھناں
خارج پیا اے آہدے
ہمسائیاں توں پن آ
جو کجھ انہاں پکائے
تھوڑا جیہاں گھن آ
سارا شاہر پھر تے لونڈی
ول کھیر گھن تے آ گئی
بہوں دیر بعد لونڈی
اوہا کھیر گھن تے آ گئی
آہدی ہے شاہر سارے
اج کھیر ہے پکائی
ساری گالکھ اوں ڈسی چا
کوئی گالھ نہ لکائی
خارج کوں لگی کاوڑ،چھوڑی او شاہر ویندے
شاہر دے باہروں ونج تے دیرا پیا او لیندے
ہک قافلے کوں آندا ڈیھدے، تاں خوش او تھیندے
روٹی انہاں توں منگداں، نیڑے انہاں دے ویندے
میکوں بکھ بہوں لگی ہے
روٹی کھوائو میکوں
جو کجھ وی ہے پکایا
تھوڑا چکھائو میکوں
قافلے دا والی کھیر چا تے آ گئے
کھیر جو پکا ھئی ، او کھیر پا تے آ گئے
خارج نے آکھیا ہرگز اج کھیر مئیں نہ کھاساں
بکھا مئیں ٹھیک بیٹھاں، بکھا ہی اج مئیں راہساں
قافلے دے مالک بندے سڈا گدے
اوندی لاونڑی ھئی پھینٹی، سوٹے چوا گدے
چھترول اوندی کر کے ، اونکوں کھیر وی کھوائی
اوں کھیر ایویں کھادی، جیویں ھئی کوئی دوائی
منکر علی دا کیویں، دنیا تے شاد راہسی
کھلے او کھاندا راہسی، زندہ ناشاد راہسی
کھا تے کھیر کھلے خارج مدینے آ گئے
ڈے ڈے تے خود کوں ولے خارج مدینے آ گئے
(جاری ہے)
سرائیکی شاعر
وحید قاسم
+923327281868 :رابطہ
